ون تو ثري .. اكشن .. ستووب .. لا لا اكشن مرة ثانية XD

 

اممم تقدرون تقولون عني اليوم هاذي قاعدة تكتب لمجرد الكتابة .. ممكن يكون في هذا الكلام شي من الصحة و ترة معاي الحق لأني قاعدة أجرب روحي بالهذرة و التدوين مع النيو ستارت مالتي خخخ

زين بهالمناسبة خلنا نطرطش بالكلام .. يعني نقول طراطيش كلام و ما نعطي زبدة << من زود اللعانة ..

يالله بسولف لكم عن مغامراتي في عطلة الصيف هاذي .. شسويت و شصار لي و أشخططت و شنو الي الله كان كاتبه ,

طبعا قبل لا يبدي الصيف لازم يكون أكو امتحانات نهائية تخلي الطالب يلعن اليوم الي انولد فيه خخخ و الامتحانات لازم تكون محطوطة في جدول مضغوط و ماكو قبله فجة للدراسة كيف لا و الوطن تمثله وزارة التربية يسعى لتخريج جيل قوي دراسيا و أكاديما و علميا ؟ لا… كلا … ليس من حقي ان اتحلطم ! يجب ان ادرس فقط و احمد ربي انها امتحانات اخر سنة دراسية لي في الثانوية و من ثم اودع كتب الحياا و الكيم و الفيز و الريض “اخر مادتين ليس تماما” بس اهم شي اني راح افتك مما يسمى بالأجا خخخخ يعني اجتماعيات ..

22

تمضي بنا الايام من بعد الامتحانات ليأتي الإعلان الرسمي لنتائج الثانوية العامة و هو اليوم الموعود والي امي دايما تقول عنه المثل الشهير: “الي في الجدر بيطلع الملاس” و طبعا هاي المثل قيل لي مرار و تكرارا لان على الرغم من انني المفروض وحدة مجتهدة و طالبة تخاف على درجاتها الا اني اقص على روحي مرات عديدة و من أبرزها المرة الي كان عندي فيها امتحان أحياء نهائي عقب الويك اند و حضرتي قررت اسافر في هالويك اند الكويت”انا ام الشيم و الحواس مايصير خالتي تولد و ماروح اسلم عليها و أطمئن على الياهل” طبعا ما يصير فيني هالإحساس إلا حزة الإمتحانات .. لكن مييييين الأم و الأبو الي يخلون بنتهم أتسافر في الويك اند ماقبل النهائي ؟ رحت قلت لهم اني بادرس في السيارة و الدرب طويل من مملكتنا الغالية الى كويتنا الشقيقة و طبعا مادرست ..بل طقيتها نومة و ماعتقد تبون تعرفون شسويت في الامتحان XD !

2

ماضي و راح .. أهم شي النتيجة النهائية .. و تخرجناا من الثنوية و يبنا هالمعدل الخوش .. الحمدلله عليه “إمتياز عال” و بدأ الإستعداد حق الحفلات و التطبل و البرابقندات الإعلامية خخخ  و يالله روحي بروفات حفلة الشيخ خليفة .. الي راح تكون بدون الشيخ خليفة  .. ليش ؟؟ يقولكم عدد المتفوقين وايد هالسنة و بيسوونها حفلتين .. وحدة حق الي فوق ­السبع و تسعين”بحضور رئيس الوزارء” و الثانية حق الي 95 لي 96.9 “بحضور وزير التربية نيابة عن رئيس الوزارء” .. قلنا يالله ماعليه أهم شي نفس البرنامج مال الحفلة و نفس الروب و نفس الشهادة خخخخ و حضرنا الحفلة و صورنا فيهاا و يات وراها حفلة التخرج الي صاارت “مو” في صالة وزارة التربية و التعليم .. ليش ؟؟ ما لقوا حجز ! ” يبون واسطة” لهذا السبب الحفلة صارت “كجرة” و لخبطة خخخ و احلى شي البنات الي عبالهم بيتفننون و راح شروا قطعة خلق شيفون ذهبية عشان يازعم تناسب الروب مال التخرج عدل مدل .. لكن في الحفلة الي صار انه شيلاتهم صارت متطابقة تماما مع مفارش الطاولات الي تارسة القاعة خخخخ يعني بالأحرى نفس الخلق بالضبط خخخخ …. كسروا خاطري لكن أية عليهم يبون يكشخوون !

و صورنا في اخبار الخليج و الايام و الوسط و الوطن و الوقت بدون مانفكر بوجهات الجرايد السياسية و الاجتماعية .. نبي نصير مشهورين و السلام واهههه .. لكن جريدة الوقت ما قصروا الصراحة .. رحت لهم ويا اخواني و خواتي اصور “كلنا لابسين نفس اللون بعد يازعم حركات” ماااجوف الا عقب يوم حطونا في ملحق المتفوقين و لكن قاصين اخواني و مو مخليني الا انة و اختي الصغيره خخخ “يمكن أخواني مو (فوتوجونيك)” من جذي ما عجبوهم ههه اي شي .. أحبطنا الصراحة و حسيت بالذنب معني مو قاصة شي هع هع <<< جب و حمدي ربج مسوين لكم ملحق في جريدتهم يا متفوقوا الوووطن

و بدينا نفكر في خطة البعثات لهذه السنة ….. نزلوا الخطة و الكل زعلان و محبط و انا الوحيدة الي متشققة و مستانسة و محتارة من كثر البعثات الي مادري شاختار منها “الحيرة ذابحتني” و الكل يطالعني و مستغرب … تدرون ليش ؟ رفيجيتي الذكية عطتني اللنك مال بعثات اللعام !! و انا قريت عليها العام الدراسي 2008-2009 صار عبالي هاي لنا ! مادريت انه لازم يكون 2009-2010 !!  لا و القهر اني نشرت اللنك بدوري و الجميع استغرب عدم تطابق الموجود في اللنك مع المنشور في الصحف المحلية و تحلطمنا على جرايدنا شفيهم كله اغلاط مطبعية ! ههههههههههههههههه

ترة صج صيفي كان كله سوالف تحديد مصير و مستقبل و بعثات و مقارنة بين المعدلات لكن الحمدلله سافرت رحت لبنان و سوريا و الكويت صج صج حسيت روحي بن بطوطة لابس قناع عن السواين فلووو … بس ما لبسته وايد لأني شكلي كان انتيكة خخخخ و لاني طولت بما فيه الكفاية و لازم ما اقرق زوود عن روحاتي و يياتي هاذي صورة فنتكية التقطتها و انا اجوب شوارع لبنان المحبة و بالتحديد شارع الحمرا

222

 

أخيراا ممكن تقولون وين الارت في هالبوست ؟ جوابي .. موب شرط أهم شي We get to know each other  هع <<< حدي عيارة

لا تنسون  ادعوا لي كل شي يتم على خير و نهايتي تكون سعيدة و يالله حسن الخاتمة 😛

تحياتي الحمراء القانية

Advertisements

4 Responses to “ون تو ثري .. اكشن .. ستووب .. لا لا اكشن مرة ثانية XD”

  1. Maryam bint 3am ummich o obooch Says:

    Bashoora 5afifat damm 🙂 o osloob ketabtech ethakrnee broo7ee youm a9’3ar 🙂 Beltawfeeg inshallah!

  2. Bashayer Arts Says:

    hehehe your comment made me happy :’)
    Thankkks :*

  3. Addictioneer Says:

    الثانوية
    الله لا يعودها من ايام

    عالبركة التخرج
    ومنها للاعلى

    اختاري التخصص اللي يناسب ميولج الدراسية واللي مستقبله الوظيفي مضمون
    وبالتوفيق

  4. Bashayer Arts Says:

    أيام الثانوية .. قمة التوتر و اللعب بالأعصاب خخخ
    مشكوور على مرورك ياااخوي 🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: